María Teresa González Fernández ñaz en Xixón nel barriu Tremañes l´añu 1950, falleciendo en dicha ciudá nel 1995. De familia humilde, cursó los sos primeros estudios nel Colexu Les Maravilles, del so queríu barriu de nacencia. Al morrer so madre, siendo ella muy neña, tuvo de dexar los estudios p´atender la casa onde vivía con so padre y los sos hermanos. Al fallecimiento de so padre, entra a trabayar como aprendiz, con 17 años, na empresa A. E. A. Crady, onde va a vivir los duros conflictos llaborales que finaron col cierre la empresa y nos que va a participar mui activamente. Cursa entonces estudios d´Auxiliar de Clínica y entra a trabayar nel Xulgáu de Proteición de Menores, pa pasar llueu al Centro d´Atención a Minusválidos onde va a prestar servicios hasta la so muerte.
Nel añu 1971 cásase col también escritor Vicente García Oliva, col que va a tener un fíu, Mauro, al que siempre va tar mui xunía y al que-y dedicó dalguna de les sos obres.
Participa na fundación y posterior desendolcu del grupo Conceyu-Bable Xixón, en 1975, y principia a escribir poesía al rodiu de 1984, cuando los conflictos llaborales yeren más fuertes. Como dixo ella en dalguna ocasión “escribo por nun gritar”.
Publica el so primer llibru de poemes, Collaciu de la Nueche, en 1987, con portada del pintor Fernando Redruello y una importantísima “Antoxana” de Xuan Xosé Sánchez Vicente que ye´l que verdaderamente la descubre como poeta.
A esi primer poemariu siguen otros como Ochobre (1988) y Heliocentru (1993), toos ellos en llingua asturiana. Pente medies d´ellos, publica en castellán Con Húmedos Lamentos de Felino pol que-y conceden el prestixosu premiu “Cálamo” en 1989. Empieza a escribir prosa y recueye tolos sos cuentos nel llibru La Casa y Otros Cuentos, siendo la primer muyer del surdimientu en publicar un volumen de narrativa.
María Teresa González continuó escribiendo y publicando en revistes hasta´l día de la so muerte, el 23 de mayu de 1995.
Más sobre la Autora y la so Obra
Los testos recoyíos nesti apartáu fueron publicaos nel llibru Por si Dixerais el Mio Nome, editáu pola Conseyería de Cultura y Turismu del Gobiernu del Principáu d'Asturies na Selmana de Les Lletres Asturinaes del añu 2008.
Fue coordináu por don Xosé Bolado a quien-y agradecemos l'enorme ciñu pa con María Teresa nun sólo nesti llibru sinón a lo llargo de la so vida.
Asina mesmo, dámos-yos les gracies a tolos colaboradores que ficieron posible esti llibru y al Gobiernu del Principau d'Asturies por permitir que lu compartamos nesta web.